عماد النحاس: مكالمة من الخطيب حسمت انتقالي للأهلي

ازاي الكلام دا يا كابتن عماد ، دول أكدولي في ميت عقبة إن الأهلي كان بيخ ــــ طف لاعبية الأسماعيلية

كنت في الإسماعيلي من 99 لـ 2001 ، وجددت وقتها 3 سنين رغم إن كان فيه تفاوض من الأهلي لأن محستش إن الأهلي محتاجني 100% وفي نفس الوقت لازم احترم الفريق اللي انا معاه.. ورغم ذلك تم اتهامي قبل التجديد إني عايز اروح الأهلي وإني مضيت للأهلي وما شابه.. بس جددت للإسماعيلي.

جيت في 2004 كان المقابل المادي من الإسماعيلي قليل، وكان باقي 6 شهور في عقدي وكان آخر سنة دي محصلتش على نص مستحقاتي لسا.. قولتلهم شرط إني أجدد إني أطلع إعارة الست شهور دول في الخليج وساعتها انتوا هتستفادوا وانا هستفاد.. جالي ساعتها عرض من الإمارات بـ80 ألف دولار > 40 للنادي - 5 للوكيل - 35 ليـا.. لكن وقتها هما رفضوا العرض بحجة إنه المقابل المادي ضعيف.. واتهموني اتهامات واضحة إني ماضي مع الأهلي.

وقتها حسيت بعدم تقدير وقولت مش مكمل في النادي وبلغتهم بـ المعلومة دي، والدنيا كلها وقتها اتقلبت عليا، وطلبت منهم بردو أخرج إعارة.. جالي عرض إعارة من النصر السعودي بـ100 ألف دولار.. قالولي في الإسماعيلي مش هتاخد من ال100 ألف حاجة، وهتتنازل عن مستحقاتك الباقية (نص عقدي) وأي مكافئات! وبالفعل دا اللي حصل واتصدر وقتها للناس إني مضيت للأهلي وإن النصر السعودي كوبري عشان اروح الأهلي وما شابه.

كلمني كابتن الخطيب قالي انت مرُحب بيك في النادي ، لكن لو حبيت تكمل في الخليج براحتك، محبتش باب الأهلي مفتوحلك في أي وقت (ودي مكالمة أعتز بيها جدًا).. خلصت الإعارة محدش كلمني وقتها خالص غير جالي عرض متأخر من قطر بس كنت رجعت مصر، فـ وفيت بكلمتي مع النادي الأهلي وكنت مبلغهم وقت التفاوض، طالما مش هلعب في مصر للإسماعيلي، يبقى هلعب مع الأهلي.