فيلم تاج .. "بومبه فى وجه الجميع "

"إنت هتبقى أول بطل عربى خارق يا تاج"

احمد بدير جد الخوارق طلع بزعبوط شتوى قال الجمله دى لتاج "تامر حسنى " اللى عملنا فيلم عن الخوارق بطوله تامر حسني تأليف تامر حسنى و أنتاج حسام حسنى اخوه تامر حسنى وموسيقى تصويريه تامر حسنى .

-والحقيقه قبل أى كلام اكثر حاجه توجع مش فى لحظه الفراق لا فى الفيلم ..هى التلميحات انه فى جزء تانى.

#المهم نكمل أسطوره تاج الخارقه اللى لما اكتشف انه خارق وبعد ما كان فى أول مشهد بيتكلم عن تربيه صحيحه للأجيال قرر انه يختفي ويظهر فى حمام البنات وقرر يرفع الفستان لتمارا "دينا الشربينى " اللى كان دورها بس ان كل مشهد تضحك على أفيهات تاج وده دور مهم لأن مستحيل حد غيرها كان هيضحك على أفيه زى " ايه ده بتعزفى كونترباص بس ده كبير اوى ده قد مستر سيد " .

وزى مثلا " انا اتبسطت اوى لدرجه انى مش عاوز أجى تانى " تامر مقتنع أن الرجاله لما تقلع البناطيل ده بيجيب ضحك من ايام عمر وسلمى وهو مصمم يورينا بوكسرات كل فريق العمل الوحيد اللى حرمنا من بوكسره كان ا.احمد بدير لأنه كان لابس بالطو وزعبوط خبره بقى.

هارون بقى البطل الشرير فى الفيلم اللى بالصدفة بيطلع تامر حسنى برده مركب صدر باتيستا وشعر اندر تيكر وعدسات أم عبير بيقرر يهد البلد فبيروح يشيل حديد كوبرى قصر النيل وبيتخانق مع عيل على كيس شيبسي بالشطه ياريته حتى بالتوميه.

دينا الشربينى ظهرت فى ٧ مشاهد تقريبا وعلشان الوقت ضيق حبت تامر حسنى أول ما شافت شنطته .

مين جهاز مكافحه الخوارق ده وبيعمل ايه طالما تاج اول بطل عربى خارق ، لما بتشوف موهوب مش حاسس بموهبته أو بيلطش فيها فى الاول بتزعل وبعدين بتسأل وبعدين بتشفق عليه وده بالظبط قرارى مع عمرو عبد الجليل موهوب وقرر ياكل عيش.

فيلم تاج أول فيلم يركز على البومبه ويعظم دورها بالريحه دى قصدى بالصوره دى .

فى حاجه غلط فى الصنعه يعنى الصوت مالوش دعوه بحركه الكاميرا تحسه جاى من فوق جرافيك ومؤثرات اتحدى ان ظاظا وجرجير كانوا اكثر اتقان ، يعنى مسكت صاروخ بأيدك ماشي لكن تصد التانى بط.... بطريقه دى ازاى؟!

انا معنديش مشكله انك تعمل عمل وحش رخم دمه تقيل لا قصه ولا صوت ولا صوره ولا اقناع ولا اداء ولا تمثيل مشكلتى انك تستعمانى وتقولى لا أنا حلو وجامد والفيلم أتعرض فى موسم المريخ وحقق صفروميت مليون لازم تعرف ان فى غلط حصل علشان لو فى جزء تانى فعلا بنفس المستوى يبقى لازم تعرضه للخوارق اللى زيك مش لينا .

#بتاع_سكتشات🤓وهذا رأيي انا.